18 yanvar 2017-ci il tarixində Anadolu Universiteti ilə Azərbaycan Dövlət İdarəçilik Akademiyasının əməkdaşlığının nümunəsi olaraq, Anadolu Universiteti Azərbaycan Proqramları Koordinatoru Azər Hətəmovun təşkilatçılığı ilə Dövlət İdarəçilik Akademiyasının dosenti Rəcəb Rəhimli Anadolu Universitenin Dövlət İdarəçiliyi ( Kamu Yönetimi) fakultəsi tələbələrilə görüşmüşdür. Tədbiri giriş sözü ilə açan koordinator Azər Hətəmov, Rəcəb Rəhimlini tələbələrə təqdim edərək, onun elmi fəaliyyəti haqqında məlumat vermiş, eyni zamanda Anadolu Universiteti tərəfindən nəşr edilən “Azerbaycan Kamu Personel Yönetimi” adlı kitabın müəllifi olduğunu və kitabın Anadolu Universiteti Azərbaycan Proqramlarında 2016-2017 tədris ilindən etibarən açılan, Dövlət İdarəçiliyi (Kamu Yönetimi) fakultəsinə qəbul olan tələbələr üçün, Universitetin dərslikləri ilə yanaşı, bu kitabın da çox faydalı olacağını söylədi. Kitabın təqdirə layiq təşəbbüs olduğu da qeyd edildi. Müəllifin bu kitabının dövlət idarəetmə sahəsində kadrların biliklərinin artırılması istiqamətindəki əhəmiyyətindən bəhs etdikdən sonra, Rəcəb Rəhimliyə buna görə öz adından və tələbələr adından təşəkkürlərini bildirdi. Koordinator həmçinin qeyd etdi ki, hər iki dövlətin-Türkiyə və Azərbaycan dövlət idarəçilik sistemini mükəmməl bilən Rəcəb Rəhimli, bundan sonra, artıq mütəmadi olaraq Azərbaycan və Türkiyə Respublikasının dövlət idarəçilik sistemini dərindən bilmələrinə dəstək üçün interaktiv seminar dərslər keçirəcəkdir. Dövlət İdarəçilik Akademiyasının dosenti Rəcəb Rəhimli, tələbələrlə mühazirəsi zamanı qeyd etdi ki, Türkiyə dövlət idarəçilik sistemini bilməklə yanaşı, sizlərin Azərbaycan dövlət idarəçilik sistemini də bilməyiniz vacibdir, çünki universiteti bitirdikdən sonra sizlərdən əksəriyyəti Azərbaycanda çalışacaqsınız. Mühazirədən məmnun qalan tələbələr Rəcəb Rəhimliyə və Azər Hətəmova öz dərin minnətdarlıqlarını bildirmişlər
